بازگشت
سپرلۍ نه ده
الحاج الهام الدين قيام الحاج الهام الدين قيام

ساړه ولاړو،هواښه شوه،وخت بهاردئ

ونې شنې شوې،غوټۍ ګل شوې،جوړسينګاردئ

خوپه خوارولس ،سپرلۍ راغلئ نه دئ

دلته مرګ دئ، دلته چوردئ،دلته ډاردئ

 

سپرلۍ هغه دی چه زړونه پکې خوښ شي

دخفګان نه ډک ،سرونه پکې خوښ شي

دولس مړې ارزوګانې،راژوندئ شي

غمځپلي ولسونه پکې خوښ  شي

چه ېې ډکه له خوښيو  زولۍ نه ده

هسې نوم ېې دسپرلي دی،سپرلۍ نه ده

 

په مونږ شپه او ورځ،بمونه راوريږي

له اسمانه سره تندرونه را وريږي

لکه مونږبه پکې وسوزي سپرلۍهم

دباران په ځای ،اورونه راوريږي

دلته چا دخوښۍ مخ ليدلۍ نه ده

هسې نوم ېې دسپرلي ده،سپرلۍ نه ده

 

دلته جنګ دئ،په وطن موسوراوربل دئ

اوس نو خوښه دسپرلي،اختيار ېې خپل دئ

که راځې سوله دې هم ،ځان سره راوړي

که خا لي لاس راغۍ ،بيا ېې نو ازل دئ

دقيام پيغام ،يو څوک سپرلي ته وروړئ

چه هيڅوک له دې ځای روغ وتلۍ نه ده

هسې نوم ېې دسپرلي ده،سپرلۍ نه ده

 

والدورف/جرمني

 

                          وصيت

 

وامې وره وصيت لورې،قلم دې خپل زيور جوړکړه

مينه په قلم کړه ،خپل قلم دزړګي  سر جوړ کړه

 

نورېې وخت تير شوی ،په ټوپکو توره نه کيږي

توره په قلم وکړه، ترې توپه او ستينګر جوړ کړه

 

دلته رواجونو کې ،دخويندوبرخې خوارې دي

حق دې دقلم په زور، دوروڼو برابر جوړ کړه

 

مات کړه درواج بوتان، لورجانې بوتشکنه شه

ته دې له قلمه  بوتشکن، تيره  تبر جوړ کړه

 

ځان له مينځيتوبه ،دقلم په زور ازاد کړه ته

ځانته دې ژوندون لورې، پخپله دبشر جوړ کړه

 

بيادې لورې خپل قلم ،جګ پاس په اوربل وټومبه

ځان په قلم ښکلی کړه، په ځای ېې دګل وټومبه

 

يا ترې جوړاميل کړه،زنګوه ېې خپله غاړه کې

ياد قيام واوره،خپل قلم  په کا کل وټومبه

 

 

دمارچ ٨ کال٢٠١١

دښځودپيوستون نړيواله ورځ


March 18th, 2011


  برداشت و بازنویسی درونمایه این تارنما در جاهای دیگر آزاد است. خواهشمندم، خاستگاه را یادآوری نمایید.
 
بازگشت
شعر،ادب و عرفان